英超：紅軍顯霸氣冠軍博得過_東方日報

英超剛進行超過一半，又係時候進行半程檢討，再向英超冠軍埋手。

今季英超雖然有熱刺、阿士東維拉相繼彈起，但虛火過後，近期氣勢已先後回落，表現飄忽且陣中球員缺乏爭冠經驗，絕非冠軍之選。

曼城戰力強橫，論個人質素絕對係英超之冠，可惜傷兵實在太多，艾寧夏蘭特、謝利美杜古、奇雲迪布尼及史東斯均為球隊核心，尤其夏蘭特更難以取代，況且曼城要兼顧歐聯衞冕霸業，冠軍只得1.57倍唔值博。

阿仙奴曼城兼顧歐聯蝕章
今季英超冠軍，好可能就係利物浦同阿仙奴之爭。兩軍戰力相若，但論穩定性、反擊力同破密集能力，始終係紅軍勝一籌。

再者，阿仙奴闊別歐聯多時，今季重返呢個大舞台，必然會力爭上游，相對下，利物浦可盡情喺歐霸盃試陣及出後備，全力喺英超出擊，紅軍英超冠軍有2.8倍，絕對係最值博嘅一隊。