澳職：阿聯主場出擊好大喜攻_東方日報

今日下午澳職獨腳戲，阿德萊德聯主場硬撼威靈頓鳳凰。阿聯有前冇後，尤其主場出擊入得又失得；鳳凰前鋒巴巴路西斯腳風轉順，為保榜首作客亦必搶，駁火格局實多波入，中位數3.5球照捧大盤。（無綫myTVSUPER周四下午4時45分直播）

阿聯今季好「大」喜「攻」，踢咗10輪聯賽已攻入20粒，火力有保證，不過佢哋後防麻麻，已經失咗17粒，明顯頭重尾輕，難怪依家只排第8位。單計近4場主場，阿聯只得2勝2負，既可炒墨爾本城6蛋，亦慘敗過畀FC悉尼五個一皮，非常神經刀，呢4次主場有3次開4球或以上，入得又失得。

鳳凰巴巴路西斯腳風轉順
鳳凰近6場獲4勝2負，只有一場食白果，雖然箭頭奧斯卡沙華達仍有傷在身，幸好另一前鋒巴巴路西斯狀態回勇，近3場狂轟4粒，總算重拾射門鞋，中場克拉利夫喺聯賽亦有4球進帳，攻力唔曳。鳳凰現時與墨爾本勝利同得20分並列榜首，咬得咁緊不容有失，作客會主動搶攻力求3分，可望合演入球騷。