意盃：拉素祖記半和好路_東方日報

今晚上演意大利盃4強次回合，首回合落後兩球嘅拉素再戰祖雲達斯。首回合拉素輸0比2，次回合回師主場肯定搶攻力圖收復失地，但球隊近期表現飄忽，要反勝談何容易，「斑馬兵團」同樣近況不穩，意盃係佢哋捧盃唯一希望，肯定會小心行事穩陣行先，既然雙方近4次交手3次開半場和，再追半場和合理。（周三凌晨3時開賽）

拉素主帥沙利上月中宣布請辭，「藍鷹」其後邀請克羅地亞名宿杜陀接手，首場領軍即在聯賽1比0擊敗今場對手祖雲達斯，但緊接住嘅意盃4強首回合再鬥祖雲達斯，卻以0比2落敗，更不利嘅係兩位主力古安杜斯同薩卡尼今場都因傷缺陣，進攻靈魂恩莫比尼要再作檢查先確定能否上陣，要反勝祖雲達斯相當困難。

傷兵問題影響排陣
今屆意盃米蘭雙雄已經出晒局，祖記只要正常發揮，冠軍絕對係囊中物，由於早前喺聯賽曾經輸過畀拉素，預料今場會打守勢波，實行留前鬥後。韋斯頓麥堅尼，以及門將馬迪亞比連今場會擔正，以該隊人腳如果立心打擦鞋仔波，半場守和可謂全無難度，半場和揀得過。