西甲：皇馬勒唔住艾拉維斯等劏_東方日報

周三凌晨西甲，皇家馬德里主場迎戰艾拉維斯。已提早鎖定聯賽冠嘅皇馬，注意力難免放喺歐聯決賽上，不過佢哋實力大超班，就算半力出擊一樣夠殺，而且一班高質後備要爭取上陣機會，落到場都會盡量表現，主場出擊大勝可期，讓球主勝讓兩球值博。（Now632周三凌晨3時30分直播）

出副選一樣夠殺
皇馬喺西甲一直領放，就算之前要兼顧埋歐聯4強，聯賽表現一樣冇走樣，西甲8連勝之餘，近兩輪仲愈贏愈多，分別3比0贏卡迪斯同4比0炒ＣＦ格蘭納達。一班「所謂」後備球員，包括祖斯奴、莫迪歷同土耳其新星艾達古拿等等，全部都具備正選實力，佢哋要爭取機會博表現，隨時仲落力過班正選球員，唔會咁易收夠籌。

艾拉維斯依家排中游位置，冇得爭歐洲賽又唔憂降班，依家正宗踢風流波，對上5場作客賽事只入過1球。睇番兩隊近年交鋒，皇馬已連續4次擊敗艾拉維斯，當中有3場都係大炒3球，足證兩軍實力相當懸殊，今場皇馬大炒格，「-2」照樣捧場。