英冠：4強次回合搶攻西布朗 修咸頓主Ｗ醒神_東方日報

英冠附加賽4強次回合大戰，修咸頓主場迎戰西布朗，兩隊首回合同樣錯失良機下踢成0比0。呢個戰果對修咸頓相當有利，因為「聖人」喺主場演出特別醒神，而且主力前鋒查阿當斯傷愈復出，有望贏波進軍溫布萊，向重返英超嘅終極目標進發，推介主勝。
（HOYTV76台周六凌晨3時直播）

修咸頓上季英超包尾降班，不過落到英冠表現出色，獲加彼德斯、阿當岩士唐、碧拿歷克、賴恩費沙等球星，都喺英超打滾多年見慣世面，首回合因傷缺陣嘅查阿當斯據報亦已康復，佢同阿當岩士唐今季合共入咗37球，入球能力好有保證。

主場夠惡！場均攻入超過2球
「聖人」今仗返主場出擊，佢哋喺地頭一向表現極佳，今季主場攻入54球，係修咸頓史上單季主場入波第2高，佢哋最近6場主場取得4勝1和1負，場均每場攻入超過2球，強勁氣勢值得信賴。

西布朗向來不擅作客，近2場作客先後輸畀李斯特城同錫周三，將作客不勝走勢增加到4場。翻查兩隊近8次交手，修咸頓亦錄得6勝1和1負絕對優勢，今仗捧主勝為明智之選。