英冠：樸茅主場割禾青_東方日報

搏命護級鬥志足
今晚英冠獨腳戲，樸茨茅夫主場迎戰米禾爾。深受降班威脅嘅樸茨茅夫為搶分護級，表現逐漸有起色，早前更加爆冷擊敗前列球隊米杜士堡，士氣高昂。反觀米禾爾高不成、低不就，爭勝戰意唔及對手，樸茨茅夫主勝值得追捧。（周三凌晨3時45分開賽）文:Mic少

樸茨茅夫今季升上英冠，顯得力有不逮，踢28場聯賽只取得7勝8和13負，僅領先尾三降班區嘅打比郡2分。不過，樸茨茅夫踢少1場，如果今仗勝出，就可以甩開5分，可大大提升護級成功機會，球員必然搏命。「樸茅」最大搶分本錢一定係地利，近7次聯賽主場，獲得6勝1和優秀成績，單計近4場仲全部贏晒，水準相當可靠。前鋒卡林蘭治近4場聯賽主場射入5球，有佢助陣，樸茨茅夫要攻入米禾爾大門，並唔困難。

米禾爾位處中游欠動力
至於米禾爾排聯賽榜中游，缺乏明確目標及動力，成績自然平平無奇，近7場聯賽只曾小勝護級分子盧頓1比0，另外6場僅3和3負。米禾爾最大弱點係攻力差，踢28場聯賽僅入27球，換言之平均1場入唔到1球，仲少過位處降班區嘅盧頓、打比郡，恐怕今場作客，更加惡唔出樣。