澳職：阿聯麥克阿瑟均細波_東方日報

今日下午澳職獨腳戲，阿德萊德聯主場迎戰FC麥克阿瑟。阿德萊德聯仍要搶分保住季後賽資格，但近況認真差；FC麥克阿瑟表現亦唔見得好幾多，加上放走兩大進攻主力，火力大減，今場累鬥累格局，寧捧3.5球嘅入球細。

（無綫82台周五下午4時35分直播）文:法達斯維

季初表現突出嘅阿德萊德聯，近期確有下滑迹象，之前7場聯賽只得1勝3和3負，上輪主場對包尾嘅布里斯班獅吼，都被逼和1比1，狀態之差有辦你睇。雖然阿德萊德聯依家排緊第5位，但只係多第7位嘅FC悉尼4分，仲需要搶分保前6嘅季後賽席位，值得留意係佢哋客強主弱，今季踢咗10輪主場贏得3場，主場出擊全無保證，今仗要踢穩陣波。

客軍射手離隊攻力減
查實FC麥克阿瑟都係客場勁過主場，不過佢哋近期有兩大主力謝明同積特祖爾離隊，兩人今季聯賽合共入咗13球，對球隊進攻影響甚大。FC麥克阿瑟近7場聯賽，僅得1勝1和5負，已經跌出前6，狀態仲衰過阿德萊德聯，而呢7場入得6粒咁大把，其中6場開3球或以下，今仗唔慌多波入，捧細盤好過。