西甲：進攻三叉戟突擊有一手 巴塞出招半W益里_東方日報

西甲爭霸3強鼎立，今輪馬德里體育會迎戰巴塞隆拿係關鍵一戰。馬體會目前僅落後巴塞1分，今仗自然希望藉主場之利擊倒對手；不過巴塞近況極勇，前線創造力同反擊力一流，隨時會反客為主，半場客勝值得捧場。（Now 632周一凌晨4時直播）文:工廠仔

馬體會今季踢法轉型，由以往鐵血防守變成進攻勁旅，不過近期狀態回落，防線出現唔少甩漏，近5場比賽失咗8球，上周中歐聯16強同皇家馬德里激戰120分鐘後射輸12碼，體能同士氣都受到好大打擊，面對巴塞嘅夢幻鋒線難有招架之力。

馬體會往績差輸埋士氣
巴塞自2025年後17仗有14勝3和，羅拔利雲度夫斯基、拉明耶馬同拉芬夏比洛尼組成「三叉戟」火力驚人，而且近4場作客3場保持不失，只要前面入到波就有極高贏面。今場作客好可能會先縮後，再靠凌厲突擊打爆對手，呢一招今季萬試萬靈。

睇番兩隊過去7次交手，巴塞全部可以喺上半場順利領先，證明佢哋踢法上剋制住馬體會，今場再追半場客勝係明智選擇。