澳職：麥克阿瑟落難讓唔起噴射機_東方日報

周五澳職賽事，FC麥克阿瑟對紐卡素噴射機。FC麥克阿瑟季前捧完澳足盃後，以為佢哋有一番作為，點知今季澳職表現不似預期，依家只係排第8，而且近期輸多贏少，實在捧唔落手，反而紐卡素噴射機近況就較似樣，今場要頂住唔輸話咁易，受讓嘅讓球客勝（+1）有計。

（myTV SUPER周五下午4時35分直播）文:邪神

FC麥克阿瑟現時排澳職第8位，同季後賽門檻有5分距離，唔容易追近，佢哋最大問題係後防不穩，近6場每場都有失波，合共失咗12球。

攻守不穩表現跌Watt
而且麥克阿瑟攻力只係有限公司，失咗波隨時追唔番，嚴重窒礙球隊爭勝機會，而且佢哋近況亦難討好，上場險勝阿德萊德聯之前，經歷5場1和4負劣績，今場實在冇贏波把握。

至於排第9嘅紐卡素噴射機，爭入季後賽機會更加渺茫，不過佢哋近況就比麥克阿瑟較理想，近5場取得3勝1和1負。上場輸畀西部聯之前，噴射機一度踢出4勝3和7場不敗走勢，今場捧讓客（+1）屬合理選擇。