日職：勝利船唔識入波為細所逼_東方日報

今晚日職焦點戰，神戶勝利船主場硬撼川崎前鋒。衞冕嘅神戶勝利船今季全無王者風範，最大問題係攻力嚴重跌Watt，遇上客場硬淨嘅川崎前鋒，隨時陷於膠着，入波唔慌多，不妨捧2.5球入球細。

（周三晚上6時開賽）文:臻贏特

近兩季稱霸日職嘅神戶勝利船，今季開咧意外失準，先喺季前日超盃輸畀廣島三箭，之後亞冠精英盃16強再被FC光州踢出局，頭9輪聯賽勝和負各3，徘徊中下游。呢支衞冕之師今季最大問題係唔識入波，9場聯賽入得7粒咁大把，單計主場近4場全開2球或以下，無論係武藤嘉紀、大迫勇也定宮代大聖，都陷入球荒。

作客嘅川崎前鋒一洗上季頹風，目前聯賽排第3位，亞冠精英盃亦打入8強，而且佢哋客場表現相當硬淨，各項賽事近8場作客獲3勝4和僅1敗，單計聯賽6場客場未輸過，絕對唔易啃，預計神戶勝利船今仗會先做好防守。翻查紀錄，兩軍近4次碰頭各贏2場，其中3次開2球或以下，今仗唔慌多波入，捧細盤好過。

惡客不死鳥空襲紅鑽
晏啲開波有場浦和紅鑽主場對京都不死鳥。紅鑽表現反覆，相反慣咗打護級嘅京都不死鳥，今季突然爆發，10輪聯賽錄5勝3和2負，連同盃賽近5場作客贏晒，有力反客為主，客勝有計。

（周三晚上6時30分開賽）