外圍賽：入球機器舒希克着晒火 捷克弗爆唔赦格仔兵_東方日報

今晚繼續上演世界盃外圍賽，歐洲區L組焦點之戰，克羅地亞主場對捷克，上屆世界盃季軍克羅地亞老化問題愈來愈嚴重，上年歐國盃分組賽慘淡出局，現時處於重建之中。反觀捷克當頭起，各項賽事近8場不敗，包括世盃外3戰全勝，前鋒柏德列舒希克腳風順，加上今仗有得受讓，一於捧讓球客勝（+1）。（周二凌晨2時45分開賽）文:Mic少

克羅地亞上周喺世盃外旗開得勝，以7比0大勝直布羅陀，但由於對手實力太弱，呢場比賽並冇參考價值。

克羅地亞青黃不接
睇番「格仔兵團」今次大軍名單，青黃不接問題仍然未有改善，39歲莫迪歷及36歲比列錫兩名老將繼續擔大旗，另外有多位球員國際賽上陣次數僅有單位數，新舊人腳需要時間磨合，水準靠唔住，一旦遇上稍具級數嘅對手，勢必面臨重大壓力。

另邊廂，捷克沉淪多年之後，近年成績有明顯進步，上屆世盃外不幸附加賽出局，其後打入上年歐國盃決賽周，今屆世盃外更加愈戰愈勇，3戰全勝排榜首，前鋒柏德列舒希克3場都有波入，合共有4球進帳。隊內仲有唔少優秀球員，包括韋斯咸「孖寶」湯馬士蘇錫克、華迪美高法爾、利華古遜門將馬迪積高華，前中後人腳實力平均。翻查雙方近2次對賽都打成平手，五五波情況下，捧受讓嘅捷克比較着數。