外圍賽：「雙紅會」狀態天與地 威爾斯當比利時冇到_東方日報

世界盃外圍賽歐洲區J組有「雙紅會」，「歐洲紅魔」比利時主場迎戰「紅龍」威爾斯。論名氣當然冇得比，不過比利時「黃金一代」已近黃昏，又未有人接到班，上場對北馬其頓都失分，剩係得個朵冇料到，相反威爾斯喺新帥比拿美領軍後未輸過，讓球盤仲有得受讓1/1.5球，下盤咪錯過。（周二凌晨2時45分開賽）文:法達斯維

比利時隨住夏薩特、維頓漢等「黃金一代」退落嚟，現時只靠奇雲迪布尼、盧卡古等老將苦苦支撐，逐漸變成「黃昏一代」，最弊係新人質素麻麻未接到棒，連帶球隊成績一齊走緊下坡，從2022年世盃分組賽出局，到上年歐國盃16強止步，明顯走晒樣。

歐洲紅魔頹爆名大於實
就算比利時易帥，改由魯迪加西亞執教，亦未能止到頹勢，日前首仗世盃外被北馬其頓逼和1比1，明顯係名大於實。

雖然威爾斯名氣同實力明顯遜一籌，較出名係丹尼爾占士、班倫莊臣、哈利威爾遜等，但勝在夠團結，主帥比拿美應記一功，呢位昔日嘅「壞孩子」，自從2024年7月上任後，帶隊9仗未輸過，包括喺歐國聯B4力壓土耳其、冰島等排第1獲得升班，慢慢累積確係有助增強信心，亦延續到世盃外，「紅龍」頭3輪錄2勝1和，排緊榜首，呢類球隊都係打道氣，現時士氣正盛梗係食住上，下盤有計。