U21歐國盃：小狂牛幼獅大駁火_東方日報

今晚U21歐國盃8強爆發上屆決賽翻版戰，由西班牙U21火併英格蘭U21。雖然兩軍今屆表現未算標青，但西班牙U21必想一報上屆決賽之仇，「幼獅」力爭衞冕亦隨時駁火，捧2.5球入球大最上算。

（周日凌晨3時開賽）文:法達斯維

西班牙U21雖然喺A組取得2勝1和以首名出線，但查實同意大利U21同分，只靠較佳得失球壓過對手，仲場場有失波，巴塞後衞謝拉特馬田更因傷退隊，而兩場勝仗都係險勝1粒。不過從好嘅方面睇，「小狂牛」場場都有波入，共入6球，即係佢哋總係比對手入多1球，既然防守好難短時間有改善，索性以攻代守，加上今場撞正仇家、上屆決賽擊敗佢哋嘅英格蘭U21，戰意更堅。

英格蘭鋼鐵防線不再
另邊廂，英格蘭U21喺B組只得1勝1和1負，僅獲次名出線，其中尾輪對住大輪換嘅德國U21仍輸波，失色不少。「幼獅」上屆6場全勝兼全部保持清白之身奪冠，可見防守穩健係主因，但今屆明顯不復再，連同之前熱身賽，英軍近5場取得11球，卻失咗10球，其中4場開3球或以上，明顯入得又失得，面對崇尚進攻嘅「小狂牛」，以其不穩防線，就算想守亦未必守得住。今場勝負難料，2.5球入球大更加值博。