沙特職：尼奧姆伊蒂哈德皆大歡喜_東方日報

今晚「除夕夜」on.cc東網繼續有沙特職激戰睇，先有頭場伊蒂哈德對尼奧姆SC，兩軍都係進攻型球隊，肯定有入球騷睇（on.cc東網周三晚11時25分直播）。另外，中東豪門之一嘅希拉爾亦會亮相，佢哋會作客強襲艾科魯特，以希軍嘅實力，應可半場輕鬆搞掂對手。（on.cc東網周四凌晨1時30分直播）

全力搶分追榜首 希拉爾速食艾科魯特
周四凌晨沙特職有場強弱懸殊之戰，艾科魯特對希拉爾，希拉爾正在搶分力追榜首艾納斯，隊內擁有達雲紐尼斯、魯賓尼維斯等球星助陣，實力非凡，即使沙特職、國王盃及亞冠精英盃3線作戰亦連番奏捷，而且作客都冇問題，近8場作客全勝，當中6場半場領先，半場客勝值博。

今季沙特職爭標格局大致形成，艾納斯10連勝領放，希拉爾亦以8勝2和不敗走勢窮追不捨，兩隊相差只有4分，希拉爾正等待艾納斯稍有失誤再迎頭趕上，當然佢哋自己現階段亦唔可以失分；睇番希拉爾今季表現，各項賽事17勝2和，近15場連勝，贏波只係基本任務，而且好多時半場已經領先，甚至奠定勝局。

馬爾甘狀態火熱
希拉爾最近休戰3星期後復賽，先在亞冠精英盃擊敗FC沙迦，到上輪沙特職再贏卡赫利3比2，一對中場穆罕默德簡奴及沙積米連高域沙域上半場各建一功輕鬆領先兩球，巴西射手馬爾甘更連續兩仗有「士哥」，球員狀態甚佳，今屆非國盃佢哋只有塞內加爾中堅高列巴尼一名球員獲徵召，其餘主力都在陣，可以全力搶分，令捧場客放心。

陪跑分子艾科魯特近期頻頻輸波，並且失球數字甚多，包括以0比4不敵艾卡迪沙，今仗主場迎戰豪門希拉爾，恐怕更加無力招架，相信半場已經舉手投降。

尼奧姆伊蒂哈德皆大歡喜
今晚沙特職直播早場，尼奧姆ＳＣ主場迎戰伊蒂哈德，新升班球隊尼奧姆ＳＣ財力雄厚，人腳質素不亞於其他傳統勁旅，踢法亦傾向進取，不時創造大比數賽果。至於伊蒂哈德擁有賓施馬等球星，攻力更加強橫，近4場作客總入球全開3球或以上，一於再追中位數2.5球嘅入球大。

主隊有拿卡錫迪助拳
尼奧姆ＳＣ今季升上沙特職後，斥巨資迅速打造豪華班底，包括聘請前巴黎聖日耳門主帥加迪亞執教，簽入前阿仙奴射手拿卡錫迪等高質素外援，整體實力有保證，具備本錢踢進攻足球，近4場有3場總入球開3球或以上，包括早前對榜首艾納斯，即使近半場時間踢少1人，最後仍然可以破蛋，輸1比3並唔失禮，預料今仗會繼續採取主攻戰術，力爭贏波。

另邊廂，伊蒂哈德狀態回勇，各項賽事近5場贏4場，期間賓施馬射入7球，腳風非常順。球隊仲有貝雲積、法賓奴泰華利斯、尼高路簡迪等猛將，有力反客為主強攻尼奧姆ＳＣ。不過，伊蒂哈德防守不穩，近2場作客合共失8球，防線存在隱憂，客W風險甚高，入球大比較值博。