英超：魔性澎湃順勢打爆宿敵 曼聯上盤萬物錯過_東方日報

周日晚英超上演「雙紅會」，曼聯主場迎戰利物浦。「紅魔鬼」近期魔性澎湃，聯賽2連勝後企穩第3，餘下4輪再取2分就穩奪歐聯資格，今場如能擊敗死敵重返歐聯更係意義非凡，加上近7次主場贏6場，要贏近期海鮮味濃兼殘陣嘅「紅軍」唔難，讓平半上盤捧得過。（Now 621及611周日晚10時30分直播）文:邪神

曼聯喺卡域克領軍下重現魔性，聯賽連場搶分後穩居第3，距離重返歐聯僅一步之遙，今場對住宿敵利物浦，「紅魔」眾將都躍躍欲試，睇番卡域克接手後，已先後擊敗曼城、阿仙奴、熱刺、阿士東維拉同車路士等勁旅，可見依家嘅曼聯，面對強敵有力一戰甚至取勝，今場對利物浦當然會以贏波為目標。

曼聯近期嘅好表現，全賴兩大中場交足貨，包括已宣布季尾離隊嘅卡斯米路，上場對賓福特又有「士哥」，隊長般奴費南迪斯今季累積19次助攻，距離奇雲迪布尼同亨利保持嘅單季20次助攻亦只差1次，今場「雙紅會」又要睇佢兩個表演。

利物浦傷鋒天殘地缺
利物浦近期又踢海鮮波，近7場3勝4負勁唔穩陣，艾基迪基同穆罕默德沙拿缺陣攻力大減，最大鑊係兩個龍門艾利臣比加同馬馬達舒維利都傷晒，今場焗用第3號門將費迪活特文把關，陣容天殘地缺，而且「紅軍」近期打硬仗都冇好結果，包括兩鬥曼城同巴黎聖日耳門全敗，首循環主場對曼聯亦輸波，今場落敗屬意料中事。