英超：維拉歎私房菜趁熱食_東方日報

英超焦點戰，阿士東維拉主場硬撼熱刺。維拉雖然有歐霸盃後顧，但整體實力較高兼近年食住熱刺，對住呢支傷兵成籮嘅北倫敦球隊，再贏唔奇，主勝捧得過。（Now 621周一凌晨2時直播）文:法達斯維

維拉於上周中歐霸盃首回合，因左閘盧卡斯迪治尼犯下低級失誤，導致作客以0比1輸畀諾定咸森林，嚟緊周中返主場打次回合，作為「歐霸專家」，主帥艾美利梗係想協助維拉捧番隻盃。不過話分兩頭，維拉若果今仗贏波，好大機會鎖定前5並取得下屆歐聯入場券，加上近4次主場出擊贏晒，相信今仗會搏埋佢。

熱刺軍容不整好濕滯
另邊廂，熱刺正處於水深火熱之中，未計今輪賽果排緊尾3，落後「安全線」尾4韋斯咸2分，聯賽剩番4輪，想護級成功除咗要自己盡力贏波，仲要望韋斯咸失分，形勢非常被動。最弊係呢支北倫敦球隊傷兵滿營，基斯甸羅美路、沙維西蒙斯、威爾遜奧度拔同蘇蘭基已因傷提早收咧，實力進一步受削，上仗對包尾大幡狼隊已經贏得好忟水，睇番佢哋近4次對住維拉輸晒，而且近10仗聯賽7度落敗，今仗凶多吉少。