西甲：華倫唔齊腳簡細盤_東方日報

爭歐協聯資格步步為營
西甲中游大戰華倫西亞主場迎戰華歷簡奴，表面上今場係爭歐協聯入場券，但其實暗藏殺機，一個唔覺意輸波，隨時跌落降班漩渦，預料兩支攻力唔算好嘅球隊，都唔會主動搶攻，加上兩軍近10次交手，9次開2球或以下，2.5球入球細穩陣。（Now 632周五凌晨1時直播）文:渡邊年

華歷簡奴季尾竟然成為涉及歐洲三大聯賽嘅主角，季前講你都唔信。首先，「華簡」殺入歐協聯決賽，令到西甲「歐洲賽系數」夠分下季攞多1張歐聯入場券，變咗西甲第6踢歐霸，第7踢歐協聯。咁本身呢個排序順褪，華歷簡奴亦會係得益者，如果歐協聯稱王，下季就升格踢歐霸，即使屈居亞軍，現時仍然有機會「搶7」攞番個燕梳位踢歐協聯。

未計周四凌晨賽事，華倫西亞同華歷簡奴只距離第7位嘅3分同2分，向上望，當然想搶3分踢歐洲賽入場券，不過向下望，其實兩軍亦只領先18位嘅基羅納3分同4分，今仗若果全失3分，最後兩場聯賽都好惡踢，所以今場各取1分，可能係雙方都樂見嘅賽果。

華歷簡奴火力唔掂
事實上兩軍攻力都麻麻，華倫西亞35戰入38球，「華簡」35戰入36球，而華倫季尾傷兵滿營，後防核心莫達迪亞卡拜及荷西古柏迪賽季報銷，華歷簡奴則有歐協聯後顧，雙方都未必排出最佳陣容。睇番雙方對賽往績，近10場9次開2球或以下，當中有6次打和，其餘分出勝負嘅都係1球起、2球止，今場入球細係重心推介，博分頭嘅朋友，可以小注和波甚至「1:1」波膽。