歐冠：A米傷兵滿營入波唔慌多_東方日報

歐聯F組焦點之戰，多蒙特主場硬撼AC米蘭，雙方上輪分組賽同樣失分，兼未能取得入球，可見兩隊鋒線球員轉戰呢項大賽，變得腳頭無靈。特別係AC米蘭傷兵頗多，預料踢法會傾向保守，以「紅黑兵團」近7場歐聯總入球全開2球或以下嘅走勢，一於再追中位數2.5球嘅入球細。（Now646周四凌晨3時直播）

多蒙特今季失去中場靈魂人物祖迪比寧咸之後，進攻唔及以往銳利，導致整體成績下滑，曾於季初德甲對2支弱隊波琴、海登咸，都無法獲勝，上輪歐聯對巴黎聖日耳門，捱打之下輸0比2，以佢哋目前人腳，恐怕無力喺歐聯立足。

多蒙特攻力欠銳利
事實上，包括上屆在內，多蒙特近6場歐聯僅有1勝3和2負，只入3球，總入球全開2球或以下，即使今仗有地利優勢，都未必能夠輕易攻入AC米蘭大門。

至於AC米蘭方面，球隊中後場球員傷兵頗多，羅夫度斯卓克、拉迪高歷、卡拿比亞、皮爾卡魯魯都有傷在身，相信今仗會穩陣行先，減少防線壓力。加上仍然依賴37歲老將基奧特爭取入波，近3場歐聯都食白果，捧入球細為妙。