歐冠：加拉塔沙雷大盤根得過_東方日報

另一場A組賽事哥本哈根對加拉塔沙雷形勢簡單，邊隊贏波全取3分，就可以唔使理會曼聯賽果，直接取得出線資格，輸波嗰隊隨時連歐霸附加賽都冇得踢，兩隊踢法肯定積極，呢場預咗睇入球騷，2.5球入球大有買趁手。■（Now644周三凌晨4時直播）

今場和波對雙方都冇好處，預計一開波就會對攻，事實上，甚少可以有機會殺入歐聯淘汰賽嘅哥本哈根，上輪作客拜仁慕尼黑已經顯示極強鬥心，同拜仁互有攻守，8次射門4次中龍，中龍次數比拜仁仲要多，尾段有個連番射門，如非拜仁門將紐亞有神奇演出，哥本哈根早已全取3分，今仗主場肯定會採取主攻。

同哥本哈根鬥攻爭出線
加拉塔沙雷近年幾近絕迹歐聯16強，最近一次入淘汰賽，已經係2013/14年球季，今年球會喺夏天大搞，簽入韋費特沙夏、薛耶治及安祖利奴，加上原本已在陣嘅莫路伊卡迪及梅頓斯，陣容絕對有力一戰。加拉塔沙雷踢法娛樂性十足，入得又失得，近7場歐聯全開3球或以上，今場2.5球入球大隨時半場已開出。