英超：惡客車路士開盧搶W_東方日報

今晚英超早場，盧頓主場迎戰車路士，作客嘅「藍戰士」今季表現極為飄忽，不過佢哋對實力較弱球隊就好有把握，近5次聯賽對新升班球隊，拎到4勝1和佳績，包括今季首循環對三支升班隊全勝，客勝值得捧場。（Now621周六晚8時30分直播）

車路士陣中球星如雲，最大問題係把握力差，不過隨住法國前鋒尼干古傷愈，史達寧同高爾彭馬亦坐完波監復出，加上烏克蘭翼鋒梅迪歷逐漸上力，「藍戰士」嘅火力有望回復應有水平。車路士球員質素毋庸置疑，對住實力唔強嘅球隊有把握贏波，領隊普捷天奴更係英超史上對新升班球隊勝率最高嘅主帥，今仗可以睇好。

「藍戰士」專恰盧頓
盧頓近期表現勇猛，近兩仗連贏紐卡素同錫菲聯，但佢哋經驗同質素不足，經常落得力戰而敗嘅結局，近3場聯賽主場1勝2負，贏到掌聲但搶分效率唔高。再者，盧頓近3次同車路士交鋒，「藍戰士」全勝兼合共轟入9球，今仗捧客勝好路。