专家拆局：格兰纳达毕胜无归

格兰纳达毕胜无归

西甲开锣抢头炮

抖咗唔够2个月，话咁快新一季西甲今晚开锣，不过两大豪门皇家马德里同巴塞隆拿下个星期先有波踢，开咧日焦点就落喺CF格兰纳达主场硬撼毕尔包。双方实力半斤八両，不过毕尔包自从传奇射手阿度里斯挂靴后，攻力削弱，况且格兰纳达近年主场出击食住「巴斯克雄狮」，今仗有力打响头炮，平手盘拣主队啱数。

毕尔包一向重用巴斯克土炮，其中箭头阿度里斯老而弥坚，创下连续15季喺西甲取得入球嘅纪录，拍住巴塞球王美斯，当中有11季效力毕尔包，可惜呢位39岁「狮王」饱受伤患困扰，上季停摆期间宣布挂靴，令「巴斯克雄狮」冇咗进攻支点，上季复赛后11场联赛赢得4仗，痛失欧霸入场券。毕尔包今夏未有喺锋线争兵，焗用状态飘忽嘅蒙尼恩及伊拿基威廉斯，不宜高估。

相反，格兰纳达上季后劲凌厉，凭住最后6轮获4胜1和1负，成功赶及搭上欧霸尾班车。虽然新兵佐治摩连拿因确诊新冠肺炎缺阵，但老将苏尔达杜、达云马捷斯及中场佩亚达斯有一定入球效率，相信影响唔大，加上格兰纳达近4次主场迎战毕尔包，取得3胜1负，包括上季大胜4比0，有往绩支持，格兰纳达平手盘值得。

皇马缩皮拉莫斯带头减薪

另边厢，皇马今晚冇波踢之馀，喺今夏转会市场都冇搞「大deal」。近日西班牙传媒更爆料，皇马再向阵中主力开刀，要求全队减薪3成。其实早喺上季停摆期间，皇马已经减过一次人工，新一季打算继续减，据悉代表球员谈判嘅沙治奥拉莫斯已带头答应。佢本人税后年薪高达1,500万欧元（约1.37亿港元），同皇马尚馀1年合约，拉莫斯打算大幅调低薪金，减薪3成即係减到1,050万欧元，再同皇马续约，希望喺「银河舰队」挂靴。