专家拆局：波斯尼亚赢波唔兰

卡士实力高一班

欧国盃外围赛附加赛B组4强，波斯尼亚主场迎战北爱尔兰，波斯尼亚人脚质素不俗，拥有多位效力大球会嘅球星助阵，包括罗马射手迪斯高、巴塞隆拿中场比真历等，整体实力喺北爱尔兰之上。双方曾于2年前两次交锋，波斯尼亚都胜出，再追主胜。

波斯尼亚喺欧国盃外围赛分组赛仅排第4位，未能取得直接出线权，要靠上届欧国联B3组榜首身份，踢今次附加赛。不过，睇番波斯尼亚喺外围赛分组赛主场成绩，其实相当唔错，5战取得3胜1和1负，当中只系输畀同组实力超班嘅意大利，甚至曾大胜第2位芬兰4比1，所以今场有埋地利优势，应该好大机会击败北爱尔兰。

2次交手赢晒北爱

北爱尔兰大部分球员只系效力英格兰低组别球队，或者苏超球队，比较有名气嘅主力仅得李斯特城中坚庄尼伊云斯，以佢嘅级数面对迪斯高同比真历，恐怕难以招架。

事实上，两队喺2年前欧国联两次交锋，波斯尼亚分别主场赢2比0及作客赢2比1，其中主场一役，迪斯高更加梅开二度，可见双方实力有距离，今场可以再追波斯尼亚主胜。