荷蘭女足火力猛慣搶攻捧半勝|東方日報

周日凌晨女子歐國盃C組重量級大戰，荷蘭女足同瑞典女足兩支以冠軍為目標嘅球隊正面交鋒。衞冕嘅荷蘭今屆強勢出戰，以美迪瑪、雲迪當克為首嘅進攻線火力驚人，近期採取搶攻踢法效果亦不俗，而且戰術上亦剋制瑞典，一於博半場主勝。

（周日凌晨3時開賽）
荷蘭女足上屆歐國盃首度奪冠，2019年世盃亦奪得亞軍，效力阿仙奴嘅王牌前鋒美迪瑪，被譽為歐洲最佳前鋒，為國家隊上陣111場入94球，加上好拍檔雲迪當克喺中場輸送，進攻火力無疑係球隊最大武器。主帥柏辛斯亦充分發揮球隊進攻實力，近期往往喺早段就進行搶攻，近5仗有4次半場領先，預料今仗亦會照辦煮碗。

瑞典女足對賽輸蝕
瑞典女足上年喺奧運女足決賽不敵加拿大，獲得銀牌，今屆幾乎以原班人腳出戰歐國盃，實力不容忽視。不過瑞典防守並唔算穩健，近兩場比賽都被對手先入波，而且近3次面對荷蘭全部先失波，包括上屆歐國盃8強被淘汰出局，今仗未必頂得住荷蘭強攻，半場主勝值博。