西甲：華歷簡奴博反彈求勝心切_東方日報

西甲搶分戰，華歷簡奴周二凌晨主場迎戰切爾達。華歷簡奴近5場聯賽贏唔到，今場係反彈好機會，事關切爾達成績更差，已經11場聯賽未贏過，預計華歷簡奴會積極搶攻，加上佢哋近4場聯賽主場全部先入波，主隊第一隊入球要捧場。■（Now632周二凌晨4時直播）

華歷簡奴雖然近5場聯賽錄得3和2負未能贏波，但都唔怪得佢哋，因為呢5場對手全屬排名前6勁旅，計有皇家蘇斯達、皇家馬德里、基羅納、巴塞隆拿同畢爾包，而且對皇馬同巴塞都打和，絕對唔失禮，只係上場聯賽作客吞畢爾包4蛋較為肉酸，因此今仗返主場出擊，更加要贏波挽回面子，爭勝決心毋庸置疑。

佢哋今場有艾方素艾斯賓奴停賽，左閘位置由查華里亞補上，雙箭頭沙治奧卡美路同艾華路加西亞，仲有老將法卡奧均可隨時候命，進攻火力十足，加上佢哋主場踢法搶韁，要率先攻破切爾達防線難度不大。

切爾達防線欠穩易失守
由賓尼迪斯執教嘅切爾達，今季戰績低落，聯賽15戰僅得1勝6和8負，唯一一場聯賽勝仗已經要數到9月初，而且佢哋15場共失25球，防線唔算穩陣，好難頂住華歷簡奴進攻，先失守屬意料中事。